نئی دہلی، 4/جون (ایس او نیوز/ایجنسی) ہتک عزتی معاملے میں مشکلات کا سامنا کر رہے راہل گاندھی کو آج جھارکھنڈ ہائی کورٹ سے راحت مل گئی۔ دراصل ہائی کورٹ نے منگل کے روز ہتک عزتی معاملہ پر سماعت کرتے ہوئے راہل گاندھی کے خلاف سزا کی کارروائی کرنے پر فی الحال روک لگانے کا حکم دیا ہے۔ ہائی کورٹ اب اس معاملے میں آئندہ سماعت 16 اگست کو کرے گا۔

قابل ذکر ہے کہ راہل گاندھی نے 2019 میں کرناٹک میں ایک جلسہ کے دوران اپنے بیان میں کہا تھا کہ ’سبھی چوروں کا سر نیم مودی ہی کیوں ہے؟‘ راہل گاندھی کے اس بیان کے بعد ان کے خلاف ملک میں الگ الگ جگہوں پر ہتک عزتی کے مقدمات درج کیے گئے تھے۔ راہل گاندھی کے خلاف جھارکھنڈ ہائی کورٹ میں ہتک عزتی کے اس معاملے پر جسٹس سنجے کمار دویدی کی عدالت میں سماعت ہوئی۔ سماعت کے دوران سبھی فریقین کے دلائل سننے کے بعد عدالت نے عرضی داخل کرنے والے پردیپ مودی کو جواب پیش کرنے کی ہدایت دی۔ ساتھ ہی عدالت نے راہل گاندھی کو راحت دیتے ہوئے آئندہ سماعت تک کسی بھی سزا کی کارروائی پر روک لگا دی ہے۔

دراصل رانچی میں بی جے پی لیڈر پردیپ مودی نے راہل گاندھی کے خلاف ہتک عزتی کا مقدمہ درج کرایا ہے۔ معاملے کی سماعت ایم پی/ایم ایل اے کورٹ میں چل رہا تھا۔ اس کورٹ نے راہل گاندھی کو ذاتی طور پر عدالت میں پیش ہونے کی ہدایت دی تھی۔ عدالت کے اس فیصلے کو راہل گاندھی نے ہائی کورٹ میں چیلنج کیا تھا۔ اسی معاملے میں آج ہائی کورٹ نے سماعت کی۔ واضح رہے کہ راہل گاندھی کو ’مودی سر نیم‘ والے بیان کی وجہ سے سورت سیشن کورٹ سے 2 سال کی سزا مل چکی ہے۔ اس سزا کی وجہ سے عوامی نمائندہ قانون کے تحت راہل گاندھی کی پارلیمانی رکنیت چلی گئی تھی۔